يبن الحسن ما هزتك صيحتنه
بسم الله الرحمن الرحيم
الشاعر: عبدالمهدي علوان التميمي(يبن الحسن ما هزتك صيحتنه)
الشهادة الإمام الهادي عليه السلام
يبن الحسن ما هزتك صيحتنه | يوم الفجروا گبة ائمتنه |
ويه الگبه انفجرنه ابدمع يالمحبوب | يمن صبرك تعداه الصبر ايوب | |
انهضمنه وحگ صبرك يبن داحي البوب | ولا صارت مثلها اليوم محنتنه |
راودتنه الليالي السود والايام | كل هاي المحن والخوف والآلام | |
كل عام اليجينه انگول هذا العام | نفرح لچن بيه تعظم مصيبتنه |
يوم ثلاثه وعشرين من عاشور | يالمهدي انهضمنه وكل گلب مجمور | |
ريت الفجر لا طر لا نشوف النور | وگبل ذاك الفجر ياريت موتتنه |
واعظم گبه النه ابارض سامره | انفجرت والخبر يالمهدي بيه ادره | |
نظل نحمل مصايب والالم يبره | المصايب مردت يالمهدي چبدتنه |
وگبر جدك الهادي وعودك المسموم | وحكيمه جدتك يلي حملت اهموم | |
وگبر امك يغايب نرجس المعلوم | منعوها يبو صالح زيارتنه |
رضينه ابهاي لاچن كل فرد منه | الزيارتكم يود كل يوم يتمنه | |
المصايبكم ننوح ونجذب الونه | ومحبتكم شرف النه يسادتنه |
ومن اذكر مصايب يبن حامي الجار | اتيه بالحساب وكل عقل ينهار | |
تحرج كل گلب والنار تاكل نار | يامعظم يبو صالح رزيتنه |
الرزيه الكل مصيبه وما نبطل النوح | وگلب كل اليحبكم بيه كثرة اجروح | |
المصيبتكم يهل دمعه حمام الدوح | وصرختنه الحزنكم دوم صرختنه |
اطلب ثار يالمهدي الك چم ثار | اول ثار ثار المصطفى المختار | |
وبعد ثار الوديعه وثار حامي الجار | الثار الثار يالمحجوب رادتنه |
وبعد ثار الحسن يبن الحسن ينخاك | ما غيرك يطلبه وثاره يتناك | |
وثار حسين جدك سيدي بچاك | ونار امخيمه ما تطفه چوتنه |
وعلي السجاد وابنه الباقر المعلوم | وبعد جعفر الصادق وابنه المسموم | |
وغريب الگضه بطوس شكثرشاف هموم | غريب ومثله احنه اليوم غربتنه |
وبعد ثار الجواد وشبله الهادي | الحزنكم دوم ظل يطوح الحادي | |
واطلب ثار عودك سيدي اننادي | المآسي والمصايب والله هضمتنه |
ونظل وياكم احنه انسير عالمنهاج | محبتكم شرف النه وسام وتاج | |
الشفاعه بجاه جدكم صاحب المعراج | نطلبها ورحمة الباري شملتنه |